- Tasa fiskalen igoera orokorra abuztuko KPIan (% 2,7) oinarrituta aplikatuko da, eta % 10eko igoera Debabarreneko Mankomunitateak udalari aplikatzen dizkion zabor-tasetan.
- Gurrutxaga: “Egungo egoera ekonomikoa hobetzeak udalerriko finantza-egonkortasunari eusteko ahalegin bateratua, progresiboa, egitea ahalbidetzen du, elgoibartarrek kalitatezko zerbitzuak jasotzen jarrai dezaten”.
Elgoibarko Udalak ordenantza fiskalak eguneratzea onartu du, Euskadiko Kontsumitzaileen Prezioen Indizearen arabera. Neurri horren helburua da udalerriaren egonkortasun ekonomikoari eustea eta herritarrei kalitatezko zerbitzuak emango zaizkiela bermatzea.
Ordenantza fiskalak astearte honetan, irailak 26, egindako Osoko Bilkuran onartu dira EAJ-PNVko 8 zinegotzien eta PSE-EEko bi zinegotzien aldeko botoekin eta EH Bilduko 7 zinegotzien kontrako botoarekin.
Ogasun zinegotzi Atsegin Uzuriagak azpimarratu duen bezala, ordenantza fiskalak erantzukizunaren, efizientziaren eta ekitatearen printzipioetan oinarritzen dira: “Bizitza gero eta garestiagoa bihurtu da, KPIaren igoerarekin, horniduren garestitzearekin (ura, argia, gasa), obren prezioen igoeragatik kostu handiagoak dituzten lizitazioekin, udal-langileen soldaten igoerarekin, eta gastu operatiboen igoera orokorrarekin udal zerbitzuetan, kiroldegian, hondakinen kudeaketan edo musika eskolan, besteak beste”.
Erronka horiei aurre egiteko, Elgoibarko Udalak proposatu du tasa fiskalen igoera orokorra abuztuko KPIan (% 2,7) oinarritzea eta zabor-tasak % 10 igotzea. Debabarreneko Mankomunitateak %10,242ko igoera aplikatu dio udalari.
Elgoibarko Udalak konpromisoa hartu du eskura dituen giza baliabideak eta baliabide ekonomikoak modu arduratsu eta eraginkorrean kudeatzen jarraitzeko.
Hobariak familia kalteberei laguntzeko
Ekitatearen ikuspegitik, hobariak ezarri dira gehien behar duten familiei laguntzeko. Hobariak printzipio honetan oinarritzen dira: gizabanako bakoitzak behar duen laguntza jaso behar du gizartean benetako berdintasuna lortzeko. Hobari horiei esker, baliabide gutxien dituztenek gutxiago ordain dezakete. Adibidez, hobariak familia ugaria izateagatik. Hobarien ehunekoak diru-sarreren eta seme-alaba kopuruaren arabera kalkulatuko dira.
Esanguratsuenak EIOZn, Eraikuntza, Instalazio eta Obren gaineko Zergan, dauden hobarien gehikuntzak dira, araudiak baimentzen duen mugaraino.
Udalerriaren finantza-egonkortasunari eusteko baterako ahalegina
Maialen Gurrutxaga alkateak nabarmendu duenez, “Udaletik akordioan eta ulermenean oinarritutako erabakiak hartzea bilatzen dugu, komunitatearekin batera lan eginez helburu komun bat lortzeko: baliabide gehiago dituztenek gehiago laguntzea eta gehien behar dutenei laguntzea hobarien bidez”.
“Azken 4 urteetan, tasak ia izoztuta mantendu ziren, eta Udalak bere gain hartu zuen karga osoa, hau da, 2.274.000 euro guztira – erantsi du Udalak –. Gainera, Eraikuntza, Instalazio eta Obren gaineko Zergan (EIOZ) sartutako hobari berriekin, 61.000 euro jasotzeari utziko zaio. Egungo egoera ekonomikoa hobetzeari esker, ahalegin bateratua egin daiteke udalerriaren finantza-egonkortasunari eusteko, elgoibartarrek kalitatezko zerbitzuak jasotzen jarrai dezaten. Ordenantza fiskalen eguneratze hau guztion ondasuna lortzeko ahalegin bateratua da: Elgoibar hobea”.
Ordenantza fiskalak eta kobrantza egutegia herritarren eskura daude www.elgoibar.eus web orrialdean.