- Estrategiak bi elementu nagusi ditu: ongietorri ekitaldi bat eta Elgoibarko Harrera Gida sortzea. Gida hori HAZen edo udal webgunean dago eskuragarri.
Elgoibarko Udalak Harrera Plan Integrala sortu du herrira iritsi berrientzat. Elgoibar herri abegitsu bihurtzeko helburuarekin, iristen diren pertsonei informazioa eta baliabideak ematea da estrategiaren ardatza, ingurune berrira errazago egokitzeko.
Ekimen horren ildotik, joan den larunbatean, ekainaren 10ean, ongietorri publikoko ekitaldi bat egin zen, elgoibartar berriei harrera egiteko. Ospakizun horrek lehen urratsa markatu zuen harrera-estrategiaren norabidean. 2023ko bigarren seihilekoan, beste ongietorri bilera bat antolatzea aurreikusi da, tokiko eragileek parte hartzeko, laguntza gehigarria emateko eta komunitatearekin loturak ezartzeko. Ekitaldi hori urtekotu nahi da.
Gainera, Harrera Gida bat sortu da. Plan integral hau sortzeko prozesua informazioa eta esperientziak bilduz hasi zen, funtsezko galdera bat ardatz hartuta: “Zer jakin beharko luke Elgoibarrera bizitzera datorren pertsona edo familia batek?”. Hortik abiatuta, tokiko eta udalaz gaindiko informazioa batu zen.
Gidak udalerriko zerbitzu interesgarri guztiei buruzko informazioa jasotzen du: oinarrizko zerbitzuak, erroldatzea, erregularizazioa, gizarte-zerbitzuak, etxebizitza, hezkuntza, osasuna, Lanbide enplegu-zerbitzua…
Gainera, gida guztiontzat eskuragarri egon dadin, euskaraz dago beti, gaztelania, frantsesa eta arabieraz lagunduta, Elgoibar osatzen duen komunitatearen beharrei erantzuteko.
Elgoibarko Harrera Gida eskuragarri dago HAZen (Santa Ana kalea, 2) edo udal webgunean.
Elgoibarko Udalak Harrera Plan Integral honen ezarpena balioetsi du, elgoibartar berrien integrazioa eta ongizatea errazteko helburuarekin. “Tokiko komunitatearekin eta erakundeekin lankidetza estuan lan egiten jarraituko dugu, gure zerbitzuak etengabe hobetzeko eta harrera esperientzia arrakastatsua bermatzeko. Tresna erabilgarria eta bizia izatea espero dugu. Pertsona bat bere bizilekua uztera behartzen duten arrazoiak askotarikoak dira, eta sarritan egoerak ez dira errazak izaten. Bidea erraztu behar zaie” jarduneko alkate Ane Beitiak azpimarratu duenez.