- Abuztuaren 23tik 29ra bitartean, Elgoibar musikaz, tradizioz eta kulturaz beteko da adin guztietarako diseinatutako programarekin.
- Egitaraua
San Bartolome jaiak ekintzen agenda bat baino askoz gehiago dira. Gure herriaz gozatzeko eta elkarrekin ospatzeko aste paregabea da, kaleak bizitzaz bete eta elgoibartar guztiak dituzten loturak indartzen dituena. Horrela, Elgoibarko Udalak San Bartolome 2026 egitaraua aurkeztu du gaur, proposamen zabala, herritar bakoitzak bere lekua aurki dezan.
Abuztuaren 23tik 29ra, Elgoibar milaka lagunentzako topagune bihurtuko da, tradizioa, kultura, musika, kirola, gastronomia eta elgoibartar guztiontzat pentsatutako jarduerak uztartzen dituen programari esker. Helburua argia da, Elgoibar eraikitzen jarraitzea, Elgoibarko nortasuna eta herritarren izaera islatuko duten eta errespetuan oinarrituta egongo diren jai ireki eta parte-hartzaileen bitartez.
Aurten, gainera, jaien hasierak izaera sinboliko nabarmena izango du. Abuztuaren 23ko txupinazoa Elgoibarko Institutuak botako du, bere 50. urteurrenaren ospakizunarekin batera. Horrela, elgoibartar belaunaldiak hezi dituen eta herriaren memoria kolektiboaren parte den erakunde baten ibilbidea aitortu nahi du udalerriak. Aurretik, ohi bezala, San Lazaro Egoitzan adineko pertsonei zapia jarriko zaie.
San Bartolome egunean, abuztuaren 24an, meza nagusia, prozesioa eta soka-dantza izango dira berriz ere herriko sustraiak eta ohiturak nabarmentzeko.
Belaunaldi guztientzako programa
Programazioak, berriz ere, adin eta sentsibilitate desberdinetarako proposamen espezifikoak eskaintzeko apustu irmoa egiten du. Horrela, asteartean Txiki eguna ospatuko da; ostegunean Adinekoen Eguna eta Haurren Eguna izango dira protagonista; ostiralean Nerabeen eta Gazteen txanda iritsiko da goitibeherekin eta drift trike erakustaldiarekin; eta larunbatean nekazal mundua eta tradizioak izango dira protagonista Baserritarren Egunarekin eta sagardo eta gazta lehiaketekin.
Egitarau honek Udalaren nahiari erantzuten dio, jaiak belaunaldien arteko topagune izatea, pertsona bakoitza ospakizunaren parte senti dadin.
Herritarrekin eraikitako jaiak
Aurtengo egitaraua ez da soilik Udalaren lanaren emaitza. San Bartolome 2026 prestatzeko prozesuan parte-hartze argi baten apustua egin da. Alde batetik, herritarrei galdetegi baten bidez parte hartzeko aukera eman zaie, zein kontzertu nahi zituzten eta zer espero zuten jaietan adierazteko. Bestetik, lau bilera egin dira herriko eragile eta elkartearekin, proposamenak jasotzeko, beharrak identifikatzeko eta jaiak herritarren ikuspegitik osatzeko. Bi bide hauen bitartez jasotako iritzi eta proposamenek programazio-erabakietan eragin zuzena izan dute, eta jaiak benetako parte-hartzatik eraikiak direla bermatzen dute.
Musika, jaien ardatz nagusietako bat
Musika jaien ardatz nagusietako bat izango da berriz ere aurten. Egitarauak, SÜNE, GOZATEGI, PURO RELAJO, KAPARRAK eta ETS bezalako erreferentziazko artista eta taldeak bilduko ditu. Gainera, herriko talentuari ikusgarritasuna emango dio Elgoibarko Musikarien Elkarteko (EME) kide diren MUZAK eta ALGUILLO ETA ALKIMISTAKen eskutik.
Kontzertu hauek egitarau erakargarria eta kalitatezkoa eskaintzeko udalaren konpromisoari erantzuten dio, udalerriko kaleak eta plazak jendez betetzeko pentsatuta dauden kontzertuekin.
Tradizioa, herri-kultura eta kaleko bizitza
Jaiek ere kaleko animazio programazio bizia izango dute. Mauxitxa eta Ustekabe txarangek jai gune ezberdinak zeharkatuko dituzte eta Trapu Zaharra, Rock Kalean, Deabru Beltzak edo Baltzola eta Lagunak bezalako emanaldiak izango dira.
Era berean, ez dira faltako herritarrek gehien maite dituzten sinboloetako batzuk, hala nola erraldoien, buruhandien eta zezenzikleten Erbuze konpartsa, tokiko nortasuna islatzen dituzten elementuak.
Sokamuturra abuztuaren 25ean, 27an eta 28an egingo da berriro. Gainera, aurten ere, Sokamuturra Kultur Etxetik eta Udaleko balkoitik ikusteko aukera izango da.
Jai inklusiboagoak, seguruagoak eta eskuragarriagoak
Udalak bere konpromisoari eusten dio, jaiak berdintasunez eta elkarrekiko errespetuz gozatu ahal izateko.
Hori dela eta, azken urteotan harrera ona izan duten ekimenak errepikatuko dira, hala nola barraketan musikarik gabeko ordu-tarteak, Lekueder parkeko buruhaundi gabeko gunea edo Gune Morea jende gehien biltzen den egunetan, indarkeria matxistaren prebentziorako.
Udalaren nahia da herritar guztien dibertsioa, errespetua, inklusioa eta ongizatea uztartzen dituen jai-eredu baterantz aurrera egiten jarraitzea.
Aita Agirre, nekazal munduaren erakusleihoa
Aita Agirre plazak protagonismo berezia izango du aurten. Abereei eragiten dieten indarreko osasun-murrizketen ondorioz, Limusin azokaren ohiko formatua egokitu beharko da. Horren ordez, abeltzaintza-ustiategi bakar bateko animalien erakusketa bat egingo da.
Espazio horri uko egin beharrean Horrela, Aita Agirre plazan nekazaritza eta gastronomia indartzeko gunea izateko apustua egin da, herritarrei Limusin arrazaren kalitatea eta Elgoibarko baserritarrek egindako hurbileko produktuak hurbilduz.
Udalerriko bizitza soziala eta kulturala dinamizatzeko inbertsioa.
2026ko San Bartolome jaietarako aurrekontua 263.900 eurokoa da. Musika da partidarik garrantzitsuena, guztizkoaren % 51rekin (134.481 euro), kontzertu eta emanaldien programazio zabalaren isla. Ganadu, baserri eta gastronomia jarduerak % 8 dira (20.863 euro), azpiegitura eta ekipamendua beste % 8 (20.555 euro), zezenak % 6 (15.529 euro), haur eta gazte egunetako jarduerak % 6 (16.257 euro) eta adinekoei zuzendutako ekitaldiak % 4 (11.397 euro). Gainerako % 17a (44.818 euro) beste partida batzuen artean banatzen da, hala nola goitibeherak, ikuskizunak, kalejirak, prentsa, sariak eta segurtasuna.
Jaiak errespetutik eta bizikidetzatik bizitzeko gonbidapena
Maialen Gurrutxaga alkateak azpimarratu du jaiak Elgoibarrerako unerik berezienetako bat direla: “San Bartolome da Elgoibarrek bere bertsiorik onena erakusten duen unea. Kaleak bizitzaz, musikaz, topaketaz eta alaitasunez betetzen dira. Programazio anitza, erakargarria eta adin guztietarako pentsatua eraikitzeko lan egin dugu, baina jaien benetako balioa pertsonek jartzen dute. Horregatik, herritar guztiak gonbidatu nahi ditugu kalera irtetera, parte hartzera, partekatzera eta gozatzera, errespetutik, elkar zaintzetik eta bizikidetzatik abiatuta. Taldeka harro egoteko moduko jaiak nahi ditugu, eta guztiok sentitu behar dugu horietan “.
Uztailaren amaieran eskuragarri egongo da programa osoa paperean, eta HAZen (Herritarren Arretarako Zerbitzua), Aita Agirreren Kultur Kafean, Jubilatuen Etxean, egoitzan, Eguneko Zentroan, Kiroldegian eta Mintxetan jaso ahal izango da, baita udalerriko hainbat merkataritza-establezimendutan ere. Egitaraua formatu digitalean ere eskuragarri egongo da udal webgunean, jarduera bakoitzaren ordutegi zehatzekin eta azken orduko edozein aldaketarekin. Nahiago dutenek ere Elgoibarko kaleetan zintzilikatutako jaietako kartelen QR kodea eskaneatu ahal izango dute.