“Jira bueltan” euskarazko jolas eta kanten DVD-liburuxka
Elgoibarko Udalak, Badihardugu elkartearen “ahotsak ikasgelan” proiektuaren baitan, eta Eskoriatza, Aretxabaleta eta Eibarko udalekin elkarlanean, Jira bueltan izeneko liburuxka eta DVDa argitaratu zuen 2018ko abenduan. Lau herrietako 9 ikastetxetako 300 haur baino gehiagok hartu zuten parte egitasmo honetan. Gurean, Herri Eskolako eta Ikastolako haurrak izan ziren parte hartu zutenak.
51 kanta eta jolas jaso ziren guztira. Adineko 60 lekuko baino gehiagoren testigantzetan oinarritutako kantak eta jolasak dira, gehienak Debarrokoak.
Ikasturte honetan ere, ikastetxeetan banatuko du Jira Bueltan liburuxka-DVDa Elgoibarko Udalak, Lehen Hezkuntzako 1. mailan, hain zuzen. Hori bai, aisialdian erabiltzeko ere oso aproposa da material hau, guraso zein hezitzaileentzat.
Gainera, liburuxka-DVDan datozen kanta eta jolas guztiak “Ahotsak Ikasgelan” webgunean ere jarri dira herritarren eskura: http://ikasgelan.ahotsak.eus/fitxak/ .
Zer da Jira Bueltan?
Bilduma bat: 14 jolas, 30 kanta-jolas eta 7 abesti
Liburuxka (letrak, azalpenak, irudiak) eta DVDa (bideoak)
Zer adinetako umeentzat?
0-12 urte, baina batez ere 4-10 urte bitartekoentzat
Norentzat da aproposa?
Umeekin jolastu nahi duen edonorentzat, baina bereziki guraso, irakasle eta hezitzaileentzat
Euskararen transmisio kanpaina
Bikote eta ezkonberriei zuzenduriko transmisio kanpaina
Gurasoekin egiten den bezala, bikote eta ezkonberriei zuzenduriko kanpaina ere antolatzen du urtero Udalak. Bikoteek ere etorkizunean guraso izan nahi badute, oraintxe dute euskara ikasteko edo sakontzeko aukera.. Horrela, euren ondorengoei hitz egin, ipuinak kontatu eta eskolako lanak egiten lagundu ahal izango baitiete. Gauza jakina da, hizkuntza baten ikasketa prozesua ez dela berehala burutzen eta, horrela, gauzak ulertzeko eta, era berean, elkarrizketa batean moldatzeko gaitasunaz jabetu arte, gutxienez, bi urte behar direla euskaltegi batean.
Beraz, bikote eta ezkonberriak euskara ikastera animatu nahi ditu Elgoibarko Udalak, eta horretarako, “zure eginkizuna, bere etorkizuna”. Lemadun kanpaina jarri du martxan.
Kanpaina hau bideratu ahal izateko ere, ezinbestekoa izan da Elgoibarko epaitegiko langileen laguntza, bikoteek epaitegian euren datuak ematerakoan jasoko baitute Udalaren mezua eta triptikoa..
Bikoteen hizkuntza gaitasuna kontuan harturik, hiru mezu ezberdin prestatu ditu UdalekoEuskara Batzordeak:
- Bikote euskaldunei zuzendutakoa.
- Bikote erdaldunei zuzendutakoa
- Bikote mistoei zuzendutakoa
Beraz, zorionak emateaz gain, euskara erabiltzeko edota ikasteko aholkua ematen die Udalak bikoteei eta ez hori bakarrik, euskara ikasteko udalak ematen dituen dirulaguntzen berri ere ematen die.
Haurra izan berri duten gurasoei zuzenduriko kanpaina
Familia da hizkuntza transmititzeko biderik nagusiena eta errazena. Transmisio horretan gurasoek duten garrantziaz oharturik, Udalak haurra izan berri duten gurasoei zuzenduriko kanpaina jarri zuen martxan 2001ean eta ildo beretik jarraitzen du.
Kanpaina hau bideratu ahal izateko, hiru euskarri erabiltzen ditu udalak:
- Gutuna: zorionak emanez eta euskara erabiltzeko edota ikasteko aholkua emanez, horretarako Udalak ematen dituen dirulaguntzak gogora araziz.
- Triptikoa: gurasoen hizkuntza gaitasuna kontuan harturik, hiru mezu ezberdin prestatu ditu Udaleko Euskara Batzordeak: lehenengoa, guraso euskaldunei zuzendutakoa; bigarrena, guraso erdaldunei zuzendutakoa; eta hirugarrena, guraso mistoei zuzendutakoa.
- “Punpalaplan Euskal Jolasen Bilduma (3)”: Udalak, orain arte, “Kontu Txikiak” eta “Txikia Izanik” izeneko materiala banatu du haurra izan berri duten gurasoen artean.
Beraz, transmisio kanpainaren bidez, Udalak euskara erabiltzeko edota ikasteko deia egin eta euskara ikasteko ematen dituen diru-laguntzen berri eman nahi die haurra izan berri duten gurasoei. Hala, 0-12 urte bitarteko haurrak dituzten gurasoek matrikularen erdia ordainduko dute Elgoibarko euskaltegietan, eta halaber, beka lortzeko aukera ere izango dute.
Kanpaina bideratu ahal izateko, ezinbestekoa da Elgoibarko bake epaitegiko langileen laguntza, gurasoek epaitegian haurra inskribatzerakoan jasotzen baitituzte Udalaren mezua eta triptikoa. Euskarazko jolas eta abestiei buruzko materiala “Punpalaplan Euskal Jolasen Bilduma” jasotzeko, berriz, Kultur Etxera, Udaleko Euskara Sailera, bertaratu beharko dute, bulego orduetan (07:30-15:00).