- Arloko adituek gorputz-irudiaren, sare sozialen eta autoestimuaren arteko harreman konplexuari helduko diote, ingurune digitalean norberaren gorputz-irudiarekin harreman osasungarria izateko tresna praktikoak eskainiz.
- Mahai-ingurua maiatzaren 7an, asteartea, arratsaldeko 18:00etan izango da Lilan.
Elgoibarko Udalak “Gorputz Irudia, Sare Sozialak eta Autoestimua” izeneko mahai-ingurua egingo dela iragarri du, hurrengo maiatzaren 7an, asteartea, arratsaldeko 18:00etan Lilan.
Bertan, Paula Fernándeze (@paulefdz) eta Andrea Osoro (@andreaosoropsikologia) adituek parte hartuko dute. Paula Fernández sare sozialetan duen eraginagatik eta gorputz-irudi positiboa sustatzeko konpromisoagatik da ezaguna. Esperientzia zabala izan du arlo horretan, eta eragin handiko ahotsa izan da aro digitalean osasun mentalari eta emozionalari buruzko eztabaidan. Andrea Osoro, aldiz, elikadura-nahasmenduen tratamenduan ibilbide sendoa duen tokiko psikologoa da. Esparru horretan duten ezagutza eta esperientzia sakonak eztabaida sortuko dute, autoestimuarekin eta gorputz-irudiarekin lotutako erronkei buruzko ikuspegi integrala eskainiz.
Mahai-inguruan hainbat gai garrantzitsu jorratuko dira, hala nola sare sozialek gorputzaren pertzepzioan duten eragina, online lodifobia, autoestimuaren eta elikadura-jokabidearen nahasmenduen arteko harremana, eta perfekzio digitalaren presioa arintzeko estrategiak. Helburu nagusia ingurune digitalean norberaren gorputz-irudiarekin harreman osasungarria sustatzeko tresna praktikoak eskaintzea da, norberaren onarpena sustatuz eta inklusioaren eta errespetuaren alde eginez.
Elgoibarko Udalak herritarren ongizate fisiko eta mentalarekiko konpromisoa berresten du ekitaldi garrantzitsu honekin. Aro digitalean osasun emozionalarekin eta autoestimuarekin lotutako gaiak jorratzearen garrantzia aitortuta, Udalak gogoetarako eta ikaskuntzarako espazioak sortu nahi ditu, herritarren garapen integralari laguntzeko.