Datorren martxoren 28a eta apirilaren 13a bitartean, “Debabarrena Gourmet” ekimen gastronomikoaren bigarren edizioaz gozatzeko aukera izango da Debabarrenean. Eskualdeko erreferentziazko jatetxeek zazpi platerez osatutako dastatze menuak eskainiko dituzte 65€-ren truke. Debabarrena Turismoak, Debabarreneko Klub Gastronomikoa osatzen duten sukaldariekin batera antolatutako ekimen gastronomikoa da iniziatiba. “Urrats bat harago joan nahi izan dugu ekimen hau diseinatzerakoan, sukaldariengan, produktuen aukeraketan eta plateren elaborazioan arreta jarriz”, azaldu du Aitziber Cortazar Debegesa Debabarreneko Garapen Agentziako “Garapen Jasangarriko eta Turismo” saileko arduradunak. Horrela bada, “Debabarrena Gourmet” ekimenak eskualdeko sukaldarien balioa jomugan jarri eta beren esperientzia agerian utzi nahi du.
“Debabarrena Gourmet” menua, zehazki, zazpi platerek osatuko dute: aperitiboak, bi hasierakok, bi plater nagusik (arraina eta haragia) eta bi postrek. Eskualdeko sei jatetxetan eskainiko da, hain zuzen ere, Eibarko Baratze Gourmeten, Elgoibarko Belaustegi Baserrian, Itziarko Kanalan, Mutrikuko Pikuan, Soraluzeko Txurrukan eta Debako Urgainen, eta jatetxe horietako sukaldariek prestatutako platerez osatuta egongo da, hurrenez hurren: Unai Altunak, Josu Mugerzak, Alberto Sánchezek, Luis Ángel Alburquerquek, Iurdana Laskurainek eta Nestor Pañunik. Halaber, ogia eta kafea menuan sartzen dira, baita ardoa ere: Arabar Errioxako Valdelana familiaren upategiko “AGNUS de Autor Malvasia” eta “AGNUS de Autor Crianz” ardo beltza eta txakolina.
“Debabarrena Gourmet” eskualdeko chef erreferenteen elaborazio bikainak dastatzeko aukera paregabea da, adibidez, onddo salteatuak gorringo onduarekin eta foie-aparrarekin, edo zapo-takoak almejekin eta ilar-saltsarekin. Jatetxe bakoitzak bere menua diseinatu du, eta proposamen guztiak debabarrenaturismo.com webgunean daude ikusgai. Otorduez gozatu nahi dutenek jatetxera bertara deituz aurrez erreserba egin beharko dute eta “Debabarrena Gourmet” menua dastatu nahi dutela azaldu.
Ekimena Debabarrenan egun pare bat igarotzeko osagarri gisa sortu da, gastronomia eta eskualdeko bisita gidatuen eskaintza uztartuz: ibilaldiak bertako bidezidorretatik, begiratokietatik ikuspegiak gozatzeko aukera, euskal DNAren ezagutza industria-museoen bitartez, zaldi-ibilaldiak, etab.
Aurkezpen ekitaldia
Ekimenaren berri emateko, aurkezpen ekitaldi bat egin da Elgoibarko San Pedro auzoko elkarte gastronomikoan. Han, parte hartuko duten jatetxeetako sukaldariek menuetan eskainiko dituzten plater batzuk aurkeztu dituzte, bakoitzak bana, eta hura nola elaboratu duten azaldu da dastatzeko aukera egon den bitartean. Era berean, ardo-ekoizleek ere beren produktuen xehetasunak eman ahal izan dituzte. Ekitaldi horretan eskualdeko erakundeetako langileak, blogariak, Euskadiko eduki sortzaile gastronomikoak, kazetariak eta udaleko teknikariak izan dira.
“Debabarrena Gourmet” ekimenak Eusko Jaurlaritzaren, Gipuzkoako Foru Aldundiaren eta Euskadi Gastronomikoaren babesa du.
