Elgoibarko Udalak eta Elgoibarko Izarrak “Errenta aitorpena euskaraz!” izeneko ekimenarekin bat egin dute, herritarrak errenta aitorpena euskaraz egitera animatzeko.
Ekimen horren baitan, herriko banku erakundeei eta aholkularitza etxeei gutun bat helarazi diete euren bezeroen artean euskararen erabilera sustatu dezaten Foru Ogasunarekiko harremanetan.
Izan ere, taulan ikus daitekeen moduan, azken urteotan handituz joan da errenta aitorpena egiteko euskara hautatu duten pertsonen kopurua, baina badago zer hobetua oraindik ere:
| 2008ko errenta aitorpena euskaraz | 2020ko errenta aitorpena euskaraz | 2024ko errenta aitorpena euskaraz | ||||
| Kopurua | Ehunekoa | Kopurua | Ehunekoa | Kopurua | Ehunekoa | |
| Elgoibar | 514 | % 8,05 | 1.068 | % 17,95 | 1.199 | % 19 |
Martxoaren 31n hasiko da errenta aitorpena Gipuzkoan. Hiru bide daude aitorpena egiteko eta guztietan erabil daiteke euskara: autolikidazio proposamena, aitorpen mekanizatua eta internet bidezkoa.
Nola aukeratu euskara
- Autolikidazio proposamena telefonoz edo internetez onartzean, aitorpena euskaraz egiteko nahia adierazita.
- Errenta mekanizatuko bulegoan laguntzen duen langileari aitorpena euskaraz egiteko nahia adierazita.
- Foru Ogasunaren Zergabidea plataforman, errenta aitorpena euskaraz aurkeztean, euskararen aldeko hautua eginda.
- Aitorpena egiteko bankuko erakunde edo gestoria bat erabiliz gero, errenta aitorpena euskaraz egiteko nahia adierazita.
