Elgoibarko Udalak osoko bilkura egin du gaur Elgoibar-Mendaro Ekiola proiektua onartzeko. Azken urratsak ematen ari dira proiektuak aurrera egin dezan, Udalek eta sustatzaileek baieztatu dute proiektua bideragarritasun fasea gainditu duela eta berehala martxan jarriko dela. Proiektua 600 bat familiarentzat bideratuta egongo da.
Ekiola, Energiaren Euskal Erakundearen eta Mondragon Korporazioko Kream ingeniaritzaren arteko lankidetzaren emaitza da. Kooperatiba ereduan oinarritzen da, eta helburua da Elgoibar eta Mendaroko herritarrek beren energia sortu eta autohornikuntza bultzatzea, eguzki energia erabiliz.
Proiektuak honako ezaugarriak ditu:
- Azalera: 21.129 m²
- Xede potentzia: 2 MWp, urtean 2.400 MWh-ko ekoizpenarekin
- Panel kopurua: 2.000 unitate
- Kokapena: Elgoibar eta Mendaro artean
Parte-hartzea hiru fasetan gauzatuko da: lehenengo fasean Elgoibar eta Mendaroko herritarrek izango dute lehentasuna; bigarren fasean, Danobatgroup taldeko langileei zabalduko zaie aukera; eta hirugarren fasean, instalazioaren inguruko 25 kilometroko eremuko bizilagun guztiek parte hartu ahal izango dute.
Danobatgroupek, proiektuaren hasieratik, bere laguntza eskaini du, eta egitasmo hau errealitate bihurtzeko ekarpena egin du. Horrela, IPDK funtsetatik 120.000 euro bideratu dira proiektuaren hasierako gastuetarako.
EKIOLA Elgoibar-Mendaro proiektuak energia berriztagarrien erabilera sustatzeko eta ingurumenarekiko erantzukizunez jokatzeko aukera eskaintzen du. Laster, eguzki energia bidezko hornikuntza autokudeatzeko aukera izango dute bizilagunek, herritarren energia burujabetza indartuz.
