UEUk dagoeneko prestatu du 2025eko otsailetik apirilera bitartean emango dituen ikastaroen eskaintza zabala. Ikastaro horiek Eibarren, Iruñean eta on-line egingo dira, eta aurreko urteetan bezalaxe, ikastaro horietan izena ematen dutenek ikastaro sorta zabala izango dute, eta askotariko jakintza arloak landu ahal izango dituzte.
Bestalde, ohikoa den moduan, Elgoibarko Udalak dirulaguntzak emango dizkie Udako Euskal Unibertsitateak aurtengo negu-udaberrian eskainiko dituen ikastaroak bertatik bertara (Eibarko eta Iruñeko egoitzetan) edo on-line egiten dituzten herritarrei.
Horren haritik, Elgoibarko Udalak ikastaroaren matrikula osoa ordaintzeko dirulaguntzak emango dizkie UEUk antolatzen dituen ikastaroak egiten dituzten langabetu, ikasle, pentsiodun eta erretiratuei. Eta lanean dihardutenei, berriz, Udalak matrikularen erdia lagunduko die diruz. Nolanahi ere, ikastaro bakoitzeko, gehienez ere, 150 euroko dirulaguntza emango da.
Ikastaroak hurrengo hauek izango dira:
- Ziklikoak gara. Nire hilekoaren zikloa ezagutzen. Otsailaren 8tik aurrera Eibarren
- Gatazka eta estresaren kudeaketa. Otsailaren 8tik aurrera Iruñean
- Nola sustatu haurren parte-hartzea ekintza komunitarioen bitartez. Otsailaren 15etik aurrera Iruñean
- GeoGebra Matematika Ikaskuntzan. Martxoaren 3an hasiko da. ONLINE
- Haur eta gazteekin heriotzaz eta doluaz maitasunetik mintzatzen. Martxoaren 3an hasiko da. ONLINE
- Musika gorpuzteko bidea. Martxoaren 8tik aurrera Iruñean
- Sare sozialetan heziz, ziberbizikidetza eraikiz. Martxoaren 10ean hasiko da. ONLINE
- Ikastetxe espazioen erabileraren eta antolamenduaren azterketa genero ikuspegitik etapa guztietan. Martxoaren 10ean hasiko da. ONLINE
- Ikasleen ahalduntzea proiektu sortzaileen bidez. Martxoaren 11n hasiko da. ONLINE
- Sexu-hezkuntza ikasgeletatik haratago. Martxoaren 11n hasiko da. ONLINE
- Irakurketa ulertezinak minak eta ezinak. Martxoaren 15etik aurrera Eibarren
- Sortzeko praktika onak. Apirilaren 5etik aurrera Eibarren
- Badakigu marrazten. Apirilaren 5etik aurrera Iruñean
Dagoeneko irekita dago matrikulazio epea, eta UEUren webgunean www.ueu.eus edo UEUren bulegoetan (Bilbo, Eibar, Iruñea) egin daiteke.
UEUk antolatu dituen ikastaroei buruzko informazio gehigarria nahi dutenek Udako Euskal Unibertsitatearen webgunean (www.ueu.eus) izango dute eskura. Eibarren programatutako ikastaroak, bestalde, Isasi-Markeskoa jauregian emango dira (943 821426, markeskoa@ueu.eus).
Bestalde, Elgoibarko Udalak ematen duen dirulaguntzari buruzko informazio gehiago lortu nahi dutenek Elgoibarko Udalaren Euskara Sailera jo beharko dute (943 744366, euskara@elgoibar.eus).