- Omenaldiak balioa eman dio Elgoibarko Udalak 1899ko irailaren 18an hartutako erabakiari, Bernardo Ecenarro irakaslearekin Marrazketa Akademia, LHren ernamuina, irekitzea hitzartu baitzuen.
Gaur goizean, ekainaren 5ean, Elgoibarko Udala BIEMH 2024 azokan, Barakaldoko BECen, izandako ekitaldi berezi batean izan da. Bertan, AFMk (Makina-Erreminta Fabrikatzaileen Espainiako Elkartea) omenaldia egin die Lanbide Heziketaren 125 urteei. Ekitaldian hainbat erakundetako ordezkariak izan dira, besteak beste, Meka, IMH, Makina Erremintaren Museoa eta Elgoibarko hainbat enpresa.
Ekainaren 3tik 7ra BIEMH Makina-Erremintaren Nazioarteko Biurteko Azokaren 32. edizioa hartuko du BECek, Elgoibarrerako garrantzi handiko ekitaldia da, ‘Makina-Erremintaren Hiriburua’ bezala ezagutzen baita. Edizio hau bereziki esanguratsua da elgoibartarrentzat, AFMk herrian Lanbide Heziketaren historia aitortzeko prestatu duen omenaldia dela eta.
Omenaldia 12:00etan izan da, eta Elgoibarko Udalak 1899ko irailaren 18an, Bernardo Ecenarro irakaslearekin Marrazketa Akademiaren irekiera hitzartu zenean, hartutako erabakia balioetsi du. Akademia hau 1916an Arte eta Lanbide Eskola bihurtu zen, Elgoibarren Lanbide Heziketaren hasiera formala ezarriz.
Ekitaldian, Maialen Gurrutxaga alkateak honako hau adierazi du: “Omenaldi hau merezitako errekonozimendua da gure komunitatearentzat eta gure arbasoen ikuspegiarentzat, formakuntzak garapen industrialerako duen garrantzia ulertu baitzuten. Elgoibarrek Lanbide Heziketaren arloan egin duen ibilbidea harro egoteko modukoa da gu guztiontzat, eta hezkuntza eta industria elkarrekin ibil daitezkeela erakusten duen adibidea da”.
Elgoibarko Lanbide Heziketaren historian mugarri garrantzitsuak izan dira, hala nola Elgoibarko Lanbide Heziketako Institutuaren sorrera 1951n, Ikaskuntza Eskolaren sorrera, Eulogio Estarta Fundazioa 1958an, eta Makina-Erremintaren Institutuaren hasiera 1991n.
AFMren omenaldia ez da izango urteurrena ospatzeko ekitaldi bakarra. Ospakizunen egitaraua urtarrilean hasi zen, Altzolatarren Dorretxea elkarte filatelikoak antolatutako zigilu erakusketa batekin. Ospakizunek irailean jarraituko dute, laster iragarriko diren hainbat ekitaldirekin.
Maialen Gurrutxagak azpimarratu duenez, “Udalak hezkuntzarekin eta lanbide heziketarekin duen konpromisoa estrategikoa da oraindik. Elgoibarren berrikuntza eta aurrerapena bultzatuko duten eta elgoibartarren bizi-proiektuak sostengatuko dituzten trebetasun eta ezagutzen garapena sustatuko duten ekimenak babesten jarraituko dugu “.