- 2013tik gaur arte, 2023 izan da erabiltzaile gehien izan dituen urtea.
- Aurten, igerilekuen denboraldia ekainaren 3an hasi zen, ohi baino astebete lehenago, eta denboraldiaren amaiera irailaren 17rako programatu zen, aurreikusitakoa baino astebete beranduago.
Igande honetan, irailak 17, eman zaio amaiera Mintxetako igerilekuen 2023 denboraldiari, ekainaren 3tik zabalik egon dena. Hiru hilabete eta erdian, 47.401 erabiltzaile izan dituzte Mintxetako igerilekuek.
Aurten, igerilekuen denboraldia ekainaren 3an hasi zen, ohi baino astebete lehenago, eta denboraldiaren amaiera irailaren 17rako programatu zen, aurreikusitakoa baino astebete beranduago, elgoibartarrek Mintxetako instalazioetan udaz eta eguraldi onaz gozatzeko aukera zabalduz. Uztailaren 14a izan zen egunik jendetsuena, 1.609 erabiltzailerekin.
2013tik gaur egun arte, 2023. urtea izan da erabiltzaile gehien izan dituena. Udal Kirol Patronatuak 2009an zenbatu zuen Mintxetako igerilekuaren erabiltzaile kopuru handiena (55.056), 2005ean zenbatzen hasi zenetik. 2012an eta 2013an ere 50.000 erabiltzaile baino gehiago izan ziren.
Elgoibarko Udal Kirol Patronatuak modu “positiboan” baloratu du igerilekuen denboraldi hau: “Mintxetak erakutsi du elgoibartarrentzat aisialdirako eta kirolerako leku garrantzitsuenetako bat dela. 2001. urtean ireki zenetik, erabiltzaileen kopuruak gora egiten jarraitu du, adin guztientzako topagune eta dibertsiorako gune gisa sendotuz. Hala ere, garrantzitsua da aipatzea aldagelen erabilera desegokia identifikatu dela, eta erabiltzaile batzuek alderdi negatibo batzuk aipatu dituzte zentzu horretan. Udalak ekarpen horiek kontuan hartuko ditu eta etorkizuneko denboraldietan erabiltzaileen esperientzia hobetzeko moduak bilatuko ditu”.
Elgoibarko Udalak eskerrak eman nahi dizkie uda honetan igerilekuez gozatu duten herritar guztiei, eta lan egingo du etorkizunean aisialdirako eta kalitate handiko kirolerako aukerak eskaintzen jarraitzeko.
Urteko erabiltzaile-kopurua:
- 2023: 47.401
- 2022: 47.000
- 2021: 41.500
- 2020: 27.000
- 2019: 43.000
- 2018: 42.000
- 2017: 34.000
- 2016: 40.411
- 2015: 45.123
- 2014: 34.522
- 2013: 53.527
- 2012: 52.000
- 2011: 42.065
- 2010: 48.000
- 2009: 55.056
- 2008: 34.342
- 2007: 15.000
- 2006: 29.000
- 2005: 32.000