- Otsailaren 1etik aurrera tenis eta padel pistetan argiztapena ez da ordainduko
Elgoibarko Udal Kirol Patronatuak aldaketa garrantzitsu bat egingo du otsailaren 1etik aurrera. Orain arte, tenis eta padel pistetan argia erabiltzeagatik 2,50 euro ordaindu behar zen orduko, abonatua izan edo ez. Hemendik aurrera, aldiz, ez da argiztapenaren kostua ordaindu beharko.
Neurri honen bidez, kirol-jarduera sustatu nahi da, tenis eta padel pistak baldintza hobeetan erabiltzeko aukera eskainiz. Horrela, abonatuek doan izango dute bai pistak erabiltzea, bai argiztapena, entrenamendu eta lehiaketak modu erosoagoan egiteko.
Bestalde, abonatu ez direnek 5,50 euro ordaindu beharko dute orduko eta pertsonako pistak erabiltzeko, aurreko baldintzak mantenduz. Halaber, argiaren erabilera doan izango da baita. Neurri honek kirol instalazioetako zerbitzua hobetzea eta erabiltzaileen esperientzia erraztea du helburu.
Elgoibarko Udal Kirol Patronatuaren erabaki hau udaleko beste kirol-instalazio eta kantxa gehienetan argiztapena erabiltzeagatik aparteko ordainketarik egiten ez delako hartu da. Hori dela eta, tenis eta padel pistetan argiaren kostua kentzea bidezkoa eta koherentea da, kirol instalazio guztien arteko tratu-berdintasuna bermatzeko.
Elgoibarko Udal Kirol Patronatuak eskerrak eman nahi dizkie erabiltzaileei, eta gaineratu du kirol eskaintza hobetzeko lanean jarraituko duela, herritar guztientzako instalazioak kalitatezkoak izan daitezen.